2013 بالدارجة

علاش بعدا بالدارجة ؟ 

وعلاش لا، الدارجة هي لغة الشارع، لغة ولاد الشعب، مافيها حزارة و مافيها عياقة.

في هاد البوست غادي إن شاء الله ندويو على ما وقع في العالم في هاد العام 2013.

مالي أو مال مالي ؟

بدات السنة بالتفرشيخ و التفركيع،فرنسا و  الأمم المتحدة قررو يفرزو و يتوزو الثوار التوارك لي محيحين على الحكومة المالية و دايرين مابغاو  ف شمال ديال مالي. سالا الماتش بانهزام الثوار.

كحل العفطة عاود ضام

أوباما عاود ربح في الانتخابات الرئاسية في الماريكان.

بلا دوباج كيف دار ولد بلادو  سي لونس أمسترونج بطل العالم في التعلاق بالبيكالا  لي حيح 7 المرات  في تور دو فرونس و لي حصلوه كاياكل الفانيد ديال الدوباج (ماشي القرقوبي) في يناير من هاد العام.

سي باراك أوباما داها و داها و الله ما خلاها، زعما عن جدارة واستحقاق.

بونوا 16 دربها في 16

من بعد ما مات جون بول 2، تولى بونوا 16 الألماني الجنسية القيادة ديال أكبر مؤسسة تجارة الأديان في العالم. 

كان كيحكم المسيحيين الكاتوليك ديال العالم هو حاط قاعو المقدس فوق الكرسي ديال الحكم في الفاتيكان ...

على ماسمعت ، والله أعلم، مانديوش تقليد شي واحد، خونا كان معندوش مع المسلمين، شحال من مرة كيفرشها معانا، خصوصا يامات الكاركاتير على سيدنا و سيدهم خاتم الانبياء و المرسلين أشرف الخلق سيدنا محمد عليه الصلاة و السلام، وحنا حيتاش ماسوكرناش ليه بقينا حاضيونو ولله الحمد .

التقويسة دارت مفعولها، والسيد كثرات عليه الهضرة بزاف،  و كثرات التهم على القصيصين لي كايضربو دراري الصغار(زعما كاياكلهم بالهجة المراكشية) ، و سمعنا على الاختلاسات و الرشاوي (من حقي نزيد فيه شويا).

السيد قرر يكحاز اللور و تخلى على الكرسي ديالو .

 مقتل شكري بلعيد الله يرحمو

شكري بلعيد سياسي و محامي تونسي تقتل في 6 فبراير 2013، و بسباب هاد الجريمة خرجو الألاف ديال المتضاهرين لي حرقو مكاتب ديال الحزب الاسلامي الحاكم النهضة.

وهاد الجريمة كانت أول حلقة في سلسلة الثورة على الاسلاميين في العالم العربي.

الفيضانات في فرنسا

3 أيام ديال الفيضانات في فرنسا سجلات خسائر كبيرة، ولكن بنادم ماكايحشم،  2 أسابع من بعد كلنا شفنا الشوهة ديال الزواج المثلي (المورض على حساب اللهجة المراكشية) ف 18 ماي 2013.

يوماين من بعد أي في 20 ماي مات 24 ميريكاني في موور بسباب العاصفة لي دايرة معاهم فورفي أبونمو.

البايرن حيحات

25 ماي ربحات البايرن ف الشومبيونز ليك على حساب دورتماند في المقهى ديال الدرب لي كان ممتلئ على أخره و تسجلات بعض الخروقات، بعض الزبائن لي سلتو أو ما خلصوش القهوة ديالهم، ولكن مقارنة مع النهائيات السابقة لم تسجل خسائر مادية في الكيسان و القراعي.

حسن روحاني، بيه فيه، إيران

14 يونيو، من نهار الأول ديال الانتخابات الرئاسية الإيرانية ربح حسن روحاني بالكرسي. 

مرسي تلاح

3 يوليوز ثورة أخرى (أولا انقلاب) في مصر على حكم الاخوان لي تشد فيها الرئيس محمد مرسي و بزاف ديال القياديين من نفس الجماعة. 

تمرد هو اسم الحركة لي حركات الشارع و ساندها الجيش.

الروينة في سوريا

في يوليوز، اتهم الجيش الحر نضام بشار الأسد باستعمال أسلحة كيماوية.

من داك الوقت و الشعب السوري كاي عاني من الحرب الأهلية. المهم في سعد سماسرية السلاح و اسرائيل لي كتشوف في أعداءها كيضعفو.

البوسة في المغرب

الصراع ما بين الحشومة أو ماشي شغلك في مازال ما سالا في هاد البلاد الكريمة، من بعد ما واحد الفضولي خدا تصويرة ديال شي براهش مكبوتين  شبعانين أفلام و مسلسلات دوزيم، كايتباوسو في الزنقة، ورماهم في فيسبوك ناضو شي فضوليين كبار و رفعو دعوة على البراهش لي تساقو للمحاكمة.

من بعد خرجو الالاف ديال المناضليين بداو كاينباوسو في العالم بأسره. 

بغيت نعرف نهار غادي يصورو شي جوج كاي ***** في الزنقة أش غادي يديرو المناضلين ؟

مونديلا مات

رغم أنه وقف لنا في طريقنا و حرم علينا تنضيم المونديال ديال 2010.
الله يسامع، خصوصا مني شفت حفل الاحتفال ديال كأس العالم للأندية بأكادير  ...  
الله يرحمو.

الراجا فراجا

الراجا في نهائي كأس العالم الأندية، فرحتينا الله يفرحك...

أول بلد عربي كيوصل النهائي ديال كأس العالم للأندية.